မိုးဗြဲနှင့် ဒီမော့ဆိုတွင် အကြမ်းဖက်စစ်ကောင်စီတပ်များက ပြည်သူများ၏ နေအိမ်များကို မီးတင်ရှို့(Video)
ရန်ကုန်၊ ဇွန် ၆
ရှမ်းပြည်နယ်နှင့်ကယားပြည်နယ် အစပ် မိုးဗြဲနှင့် ကယားပြည်နယ် ဒီမော့ဆိုမြို့နယ်တို့တွင် အကြမ်းဖက်စစ်ကောင်စီတပ်များက ပြည်သူများ၏ နေအိမ်များကို ယနေ့ မီးတင်ရှို့ကြောင်း ဒေသခံများနှင့် မျက်မြင်များက ရန်ကုန်ခေတ်သစ်သတင်းဌာနသို့ ပြောဆိုသည်။
မီးတင်ရှို့ခံရသည့်နေအိမ်များသည် လူမရှိဘဲ စစ်ဘေးရှောင်ထွက်ပြေးနေရသည့် အိမ်များဖြစ်ကြောင်း သိရှိရသည်။
"သူတို့ကလေ ဒီမော့ဆိုမြို့ထဲ အထိ ပစ်ခတ်ဝင်လာတယ်။ နောက်ပြီး တစ်ဖက်နဲ့ တစ်ဖက်အပြန် အလှန်ပစ်တယ်။ ဒီဘက်က ပြည်သူ့အဖွဲ့တွေ နောက်ဆုတ်ရင် သူတို့ ရှေ့တိုးလာပြီး အကာ အကွယ်ယူပြီး သူတို့ကို ပစ်ခတ်တယ်လို့ ထင်တဲ့ နေအိမ်တွေကို မီးတင်ရှို့တော့တာပဲ။ ဓာတ်ဆီပုံးတွေ သူတို့ဆီမှာ တစ်ခါတည်းပါလာတာလည်း တွေ့ရတယ်" ဟု ဒီမော့ဆိုတွင် ပြည်သူတချို့၏ နေအိမ်များ မီးရှို့ခံရမှုကိုယ်တိုင် တွေ့မြင်ရသူ ဒေသခံတစ်ဦးက ဆိုသည်။
အလားတူ မိုးဗြဲတွင်လည်း ပြည်သူတချို့၏ နေအိမ်များကို အကြမ်းဖက်စစ်ကောင်စီတပ်များက ဝင်ရောက်မီးရှို့သည်ကို မြင်တွေ့ရကြောင်း ဒေသခံများက ဆိုသည်။
"သူတို့လူတွေ လမ်းလျှောက် ခြေလျှင် ချီတက်လာတယ်။ အဲဒီမှာ သူတို့ စိတ်မထင်ရင် မထင်သလို လမ်းဘေးနားက အိမ်တွေကို ဝင်ရှို့သွားတာ။ ရပ်ကွက်အတွင်းထဲထိတော့ မဝင်ဘူး။ လမ်းဘေးနား အိမ်ကြီးအိမ်ကောင်းတွေကို ရှို့တာ။ အိမ်နည်းနည်းမကောင်းရင်တောင် သူတို့မရှို့ဘူး" ဟု မိုးဗြဲဒေသခံတစ်ဦးက ဆိုသည်။
အကြမ်းဖက်စစ်ကောင်စီက ဇွန်လ ၄ ရက်နေ့တွင် ရပ်ကွက်၊ မြိုရွာများ၊ ပြည်သူများ၏ နေအိမ်များအတွင်းမှ အကာအကွယ်ယူ တိုက်ခိုက်နေမှုများကို တိုက်ခိုက်ချေမှုန်းမည်ဟု ကြေညာပြီးနောက် တရားဝင် ထုတ်ပြန်ကြေညာပြီးနောက် ယနေ့နံနက်ပိုင်းမှစတင်၍ ရပ်ကွက်များအတွင်းသို့ လက်နက်ကြီးများဖြင့် ပစ်ခတ်ခြင်း၊ လူနေအိမ်များကို မီးရှို့ခြင်းနှင့် ဘုရားကျောင်းများကိုပါ မချန် ပစ်ခတ်ဖျက်ဆီးခြင်းများကို ဆက်တိုက် လုပ်ဆောင်လာနေခြင်းဖြစ်သည်။
အကြမ်းဖက်စစ်ကောင်စီတပ်က မိုးဗြဲတွင် ညအချိန်အထိ ပြည်သူနေအိမ်များကို မီးလိုက်ရှို့ နေပြီး ကုန်စုံဆိုင်များကို သော့ရိုက်ဖွင့်ပြီး ပစ္စည်းတွေကို ကားပေါ်တင်ခိုးယူသွားကြောင်း ကရင်နီလူငယ်အစည်းအရုံး UKSY က သတင်းထုတ်ပြန်သည်။
အလံဖြူထောင်ထားသည့် ဒီမော့ဆို ရှိ ငြိမ်းချမ်းခြင်းသခင်မ ဘုရားကျောင်းတော်ကို အကြမ်းဖက် စစ်ကောင်စီတပ်များက လက်နက်ကြီးများဖြင့် ရည်ရွယ်ပစ်ခတ်၍ ဘုရားကျောင်းတော်မျက်နှာစာ ပျက်စီးနေသည်ကို ဇွန်လ ၆ ရက်နေ့ ညနေပိုင်းတွင်တွေ့မြင်ရသည်။
Photo Credit-CJ
ဒီမော့ဆိုတွင် လူနေရပ်ကွက်များအတွင်းသို့ ယနေ့ နံနက်ပိုင်းမှစတင်၍ အကြမ်းဖက်စစ်ကောင်စီတပ်များက လက်နက်ကြီးများဖြင့် ပစ်ခတ်နေပြီး မပေါက်ကွဲဘဲ ရှိနေသည့် လက်နက်ကြီးကျည်များလည်း ရှိနေကြောင်း သိရှိရသည်။
ကယားပြည်နယ်၊ဒီမော့ဆိုတွင် ယနေ့နံနက်ပိုင်းမှစတင်၍ အကြမ်းဖက်စစ်ကောင်စီတပ်က ရပ်ကွက်နှင့်လူနေအိမ်များကို လက်နက်ကြီးဖြင့် ပစ်ခတ်ဖျက်ဆီးလျက်ရှိကြောင်း PKPF တိုးတက်သောကရင်နီပြည်သူ့အင်အားစုက သတင်းထုတ်ပြန်သည်။
