ဟားခါးမြို့နယ် အဝင်ရှိ ဘုံးဇုံး ရဲစခန်း ဝင်အတိုက်ခံရ၊ စစ်သားနှင့် ရဲ ၂၀ ခန့် သေဆုံး
ဧရာဝတီ၊ ဇွန် ၃၀၊ ၂၀၂၁
ချင်းပြည်နယ်၊ ဟားခါးမြို့နယ် အဝင်ရှိ လုံခြုံရေးဂိတ်တခုအနီးတွင် ရှိသည့် ဘုံးဇုံး ရဲစခန်းကို ချင်းကာကွယ်ရေး တပ်ဖွဲ့ များက မနေ့က မနက်ပိုင်းက ဝင်ရောက် တိုက်ခိုက်ရာ စစ်ကောင်စီဘက်မှ စစ်သားနှင့် ရဲ ၂၀ ခန့် သေဆုံးခဲ့ကြောင်း သိရသည်။
CDF(ဟားခါး)၏ သတင်းထုတ်ပြန်ချက်အရ ဇွန်လ ၂၉ ရက်နေ့ နံနက်ပိုင်း ၅ နာရီ မိနစ် ၄၀ မှ ၁၁ နာရီ အထိ ဘုံးဇုံး ရဲစခန်းတွင် တိုက်ပွဲဖြစ်ပွားရာ စစ်ကောင်စီဘက်က လူ ၂၀ သေဆုံးခဲ့ပြီး CDF ဘက်မှ အကျဆုံး မရှိဘဲ မစိုးရိမ်ရသော အသေးစားဒဏ်ရာ ရရှိသူ တဦးသာ ရှိခဲ့ကြောင်း သိရသည်။
“ဟားခါးမြို့ မှာ အဝင်ဂိတ် ရှိတဲ့နေရာမှာ ရဲစခန်းတခု ရှိတယ်။ အဲဒီနေရာမှာ ရှိတဲ့ အဝင်ဂိတ်ကို CDF က ဝင်ဖြိုတာ။ ရဲတွေ တော်တော် ကျတယ်။ မနေ့က ပစ်တုန်းက ကျနော်တို့ သဲတွေ သွားသယ်တဲ့ ကားတွေတောင် ပိတ်မိနေသေးတယ်။ ပစ် တာလည်း တော်တော်ကြာတယ်။ တိုက်ပွဲပြီးတော့ CDF ဘက်က ပြန်ဆုတ်သွားတယ်”ဟု ဟားခါးမြို့ ခံတဦးက ပြောသည်။
စစ်အာဏာသိမ်းမှုကို လက်မခံသည့် ဒေသခံများက ချင်းကာကွယ်ရေးတပ်ဖွဲ့ များ ဖွဲ့စည်းပြီး စစ်ကောင်စီ လက်နက်ကိုင် တပ်များကို ရရာ လက်နက်ဖြင့် မေလမှ စတင်၍ တော်လှန်လျက်ရှိရာ နှစ်ဖက်စလုံးတွင် ထိခိုက်ကျဆုံးမှုများ ရှိခဲ့သည်။
စစ်တပ်က အာဏာသိမ်းယူပြီးနောက်ပိုင်း ယနေ့အချိန်အထိ ဟားခါးမြို့တွင် စစ်ကောင်စီ၏ ဖမ်းဆီးခြင်းခံရသူ ၅၀ ကျော် ရှိမည်ဟု ခန့်မှန်းထားရာ ယနေ့တွင် စစ်တပ်ကို ဆန့်ကျင်ဆန္ဒပြသူ လူ ၄၁ ဦး ပြန်လည် လွတ်မြောက်လာပြီ ဖြစ်ကြောင်း သိရသည်။
အင်းစိန်မြို့နယ် ပိန္နဲကုန်းနေ ဒလန်ဟုသမုတ်ခံရသူတစ်ဦး သေနတ်ဖြင့်အပစ်ခံရပြီး သေဆုံးခဲ့ကြောင်း အင်းစိန်မြို့နယ်တွင်နေထိုင်သူများက ပြောသည်။
ဖြစ်စဉ်မှာ ဇွန် ၃၀ ရက် နံနက် ၈ နာရီကျော်တွင်ဖြစ်ပွားခဲ့ပြီး သေဆုံးသူမှာ ဦးမောင်မောင် (အသက် ၅၀ နှစ်) ဖြစ်သည်။
" သေနတ်နဲ့ သုံးချက်ပစ်သွားတယ်။ သူ့မြေးကို ကျောင်းသွားပို့ရင်းပြန်အလာမှာ အပစ်ခံရတာ" ဟု အင်းစိန်မြို့နယ် နေသူတစ်ဦးက ပြောကြားသည်။
အပစ်ခံရသည့်နေရာမှာ အင်းစိန်မြို့နယ် သရက်ခြံ (၃) လမ်းရှိ လမ်းဖြတ်နေရာတွင် အပစ်ခံရခြင်းဖြစ်ပြီး ပွဲချင်းပြီး သေဆုံးခဲ့ခြင်းဖြစ်သည်။
ဦးမောင်မောင်သည် ဆန္ဒပြသူများ၏ သတင်းကို စစ်ကောင်စီကို ပေးပို့ခြင်းများရှိကြောင်း ဒေသခံများက စွပ်စွဲထားကြသည်။ ပစ်ခတ်မှုဖြစ်ပွားပြီးနောက် အခင်းဖြစ်ပွားခဲ့သည့် သရက်ခြံလမ်းအား စစ်ကောင်စီတပ်ဖွဲ့ဝင်များက ပိတ်ထားပြီး စစ်ဆေးလျက်ရှိသည်။
ဓာတ်ပုံ-အခင်းဖြစ်ပွားရာနေရာတွင် စစ်ကောင်စီတပ်က စစ်ဆေးနေခြင်းဖြစ်သည်။