ကျုံပျော်လှေဆွဲကျေးရွာတွင် ကလေး၊ အမျိုးသမီးအပါအဝင် ပြည်သူ ၁၇ ဦးကို အစုလိုက်အပြုံလိုက် စစ်ကောင်စီတပ်က သတ်ဖြတ်
ဧရာ၀တီတိုင်း၊ ကျုံပျော်မြို့နယ်၊ လှေဆွဲကျေးရွာတွင် ယနေ့(ဇွန် ၅) နံနက် ၃ နာရီခွဲဝန်းကျင်မှစတင်၍ အကြမ်းဖက်စစ်ကောင်စီတပ်များက ကျေးရွာသို့ ဝင်ရောက်စီးနင်းရှာဖွေမှုများ လုပ်ဆောင်ခဲ့ပြီး ဒေသခံပြည်သူများနှင့်ပဋိပက္ခဖြစ်ရာ ကလေးငယ် ၁ ဦး၊ အမျိုးသမီး ၂ ဦး အပါအဝင် ပြည်သူ ၁၇ ဦးကို သတ် ဖြတ်လိုက်ပြီး ဒဏ်ရာရရှိသူ ၉ ဦးရှိကြောင်း ဒေသခံကျေးရွာသားများက ပြောဆိုသည်။
ကျောင်းဆရာမ၏ လက်နက်သတင်းမှားပေးမှုမှ စတင်
ကျုံပျော်မြို့နယ်၊ လှေဆွဲကျေးရွာရှိ အခြေခံပညာမူလတန်းကျောင်းတွင် ကျောင်းတက်သူ ကျောင်းသား၊ ကျောင်းသူတစ်ဦးမှ မရှိရာ ယင်းမရှိမှု အပေါ် ကျောင်းဆရာမနှင့်ကျေးရွာအကြား အခြေတင်ဖြစ်ပေါ်သည်။ ယင်းနောက် ကျောင်းဆရာမက လှေဆွဲကျေးရွာတွင် လက်နက်များ ဖွက်ထားပါသည်ဟု ဆိုကာ အကြမ်းဖက်စစ်ကောင်စီတပ်ထံသို့ သတင်းမှားပေးခဲ့သည်။
အကြမ်းဖက်စစ်ကောင်စီတပ်များသည် ဇွန်လ ၅ ရက်နေ့ နံနက် ၃ နာရီခွဲဝန်းကျင်တွင် ကျေးရွာအတွင်းသို့ ဝင်ရောက်လာပြီး လက်နက်များကို ရှာဖွေပြီး ကျေးရွာသားများကို ရိုက်နှက် ဖမ်းဆီးမှု များလုပ်ဆောင်သည်။ ယင်းသို့ ကျေးရွာအပေါ် မတရား ဖိနှိပ်မှုများကို ကျေးရွာသားများက မခံမရပ်နိုင်ဖြစ်ရာ ကျေးရွာသားများက ရရလက်နက်များဖြင့် ပြန်လည် ခုခံကြသည်။
PDF မဟုတ်ဘဲ ရွာသားများက ကျောက်ခဲ၊ လေးခွများဖြင့် ခုခံ ပစ်ခတ်
အကြမ်းဖက်စစ်ကောင်စီတပ်များက လှေဆွဲကျေးရွာသားများအပေါ် ဖိနှိပ်လွန်းသဖြင့် ကျေးရွာသားများက လောက်လေးခွများဖြင့် စတင်ပစ်ခတ်ခဲ့ပြီး ဖမ်းဆီးခံ ရွာသားများ လွတ်မြောက်ရေး စတင်ကြိုးစားကြသည်။ နံနက် ၇ နာရီခွဲကျော်မှစတင်၍ ရွာသားများက ပြန်လည် ခုခံခြင်းဖြစ်ပြီး ၎င်းတို့၏ အဓိက လက်နက်မှာ လောက်လေးခွဖြင့် ပြန်လည် တိုက်ခိုက်ခြင်းဖြစ်သည်။
စနိုက်ပါ လက်နက်ကြီးများဖြင့် အကြမ်းဖက်စစ်ကောင်စီက ပြည်သူများကို သတ်ဖြတ်
အကြမ်းဖက်စစ်ကောင်စီတပ်များက အင်အားအလုံးအရင်းဖြင့် လှေဆွဲကျေးရွာကို ၀ိုင်းလိုက်ပြီး မည်းမည်းမြင်ရာကို စနိုက်ပါ ၊ လက်နက်ကြီးများဖြင့်ပါ ပစ်ခတ်သည် ။ ယင်းသို့ ပစ်ခတ်မှုများကြောင့် လေးခွ၊ ဂတ်စ်လက်နက်တချို့ဖြင့် ခုခံသော ကျေးရွာသားများ ကျဆုံးသည့်အပြင် ကျေးရွာအတွင်းမှ ထွက်ပြေးသော ၄ နှစ်သားအရွယ်ကလေးငယ်တစ်ဦး၊ အမျိုးသမီး ၂ ဦး ကိုပါ အကြမ်းဖက်စစ်တပ်က ပစ်သတ်ခဲ့သည်။
ကျေးရွာတွင် ပြည်သူ့ကာကွယ်ရေးတပ်ဖွဲ့ မရှိဘဲ ကျေးရွာသားများက စစ်တပ်၏ ရက်စက် ဖိနှိပ်မှုကို မခံနိုင်ရာမှ ပြန်လည် ခုခံခြင်းဖြစ်သည်။ ယင်းကျေးရွာတွင်လည်း လက်နက်ဟူ၍ မယ်မယ်ရရ ဘာဆိုဘာမှ မရှိပေ။
နောက်ဆုံးအခြေအနေ
ကျေးရွာမှ ရွာသူရွာသားအားလုံး ထွက်ပြေးတိမ်းရှောင်နေကြပြီး အကြမ်းဖက်စစ်ကောင်စီတပ်က ရွာအတွင်းတွင် တပ်စွဲထားသည်။ ပစ်ခတ်မှုကြောင့် ဒဏ်ရာရရှိသူ ၉ ဦးမှာလည်း လက်ရှိတွင် ဆေးကုသမှု ခံယူခွင့်မရဘဲ ထွက်ပြေးနေရသည်။
အကြမ်းဖက်စစ်တပ်က ပစ်သတ်လိုက်သော အလောင်းများ ရှိနေဆဲဖြစ်ပြီး မည်သည့် ရွာသူရွာသားကမှ အလောင်းသွားမကောက်ရဲပေ။ လှေဆွဲကျေးရွာတွင် အကြမ်းဖက်စစ်ကောင်စီတပ်များသည် လေးခွဖြင့်သာ ခုခံနေသော ပြည်သူများကို ရက်စက်စွာ စစ်ရာဇဝတ်မှု ကျူးလွန် သတ်ဖြတ်ခြင်းဖြစ်ကြောင်း ဒေသခံများအားလုံးက အတည်ပြုထားသည်။
Credit: ရန်ကုန်ခေတ်သစ်သတင်း
မိုးဗြဲတွင် စစ်ကောင်စီမှ ပစ်ခတ်သည့် လက်နက်ကြီးကျည် ထိမှန်ပြီး ပြည်သူ့ကာကွယ်ရေးတပ်သား ၁ ဦး ကျဆုံး
ယနေ့ ဇွန်လ ၅ ရက် နံနက်ပိုင်းမှစ၍ မိုးဗြဲတွင် အကြမ်းဖက် ဖက်ဆစ် စစ်တပ်နှင့် ပြည်သူ့ကာကွယ်ရေးတပ်ဖွဲ့များ တိုက်ပွဲပြင်းထန်ခဲ့ပြီး မိုးဗြဲ PDF တစ်ဦး လက်နက်ကြီး ထိမှန် ကျဆုံးကာ အရပ်သားအချို့ ထိခိုက်ဒဏ်ရာရသည်ဟု KNDF မှ သတင်းထုတ်ပြန်သည်။
ယနေ့ညနေပိုင်းအထိ အကြမ်းဖက်စစ်ကောင်စီ မိုးဗြဲ ၄၂၂ တပ်ရင်းနှင့် လွိုင်ကော် ၂၆၁ တပ်ရင်းမှာ လက်နက်ကြီးများဖြင့် ပစ်ခတ်နေသည်ဟု သိရသည်။
