မြန်မာစစ်အာဏာသိမ်းမှု ရှုတ်ချပြီး ရွေးကောက်ပွဲရလဒ်ကို လေးစားရန်၊ ဖမ်းဆီးထားသူအားလုံး လွှတ်ရန်နှင့် လက်နက်စီးဆင်းမှု တားဆီးရန် ကုလညီလာခံက ဆုံးဖြတ်ချက်ချ၊
ဇွန်လ ၁၈ ရက်နေ့ ကျင်းပသည့် ကုလသမဂ္ဂအထွေထွေညီလာခံက မြန်မာစစ်တပ်၏ စစ်အာဏာသိမ်းမှုကို ရှုတ်ချပြီး ၂၀၂၀ ရွေးကောက်ပွဲရလဒ်ကို လေးစားရန်၊ ဒေါ်အောင်ဆန်းစုကြည်အပါအဝင် ဖမ်းဆီးထားသူများ အားလုံးကို ချက်ချင်းလွှတ်ပေးရန်၊ လက်နက်စီးဆင်းမှုကို တားဆီးရန် အဖွဲ့ဝင် နိုင်ငံပေါင်း ၁၁၉ နိုင်ငံခု၏ ထောက်ခံမှုဖြင့် မြန်မာနိုင်ငံအပေါ် ဆုံးဖြတ်ချက်များ ချမှတ်လိုက်ကြောင်း သိရှိရသည်။
ကုလသမဂ္ဂအဖွဲ့ဝင်နိုင်ငံ ၁၁၉ ခုက မြန်မာ့အရေးဆုံးဖြတ်ချက်ကို ထောက်ခံမဲပေးခဲ့ကြပြီး ဘယ်လာရုစ်က ကန့်ကွက်မဲပေးကြောင်း၊ တရုတ်၊ ရုရှား၊ ထိုင်း၊ လာအို၊ ကမ္ဘောဒီးယားနဲ့ ဘရူနိုင်းအပါအဝင် ၃၆ နိုင်ငံက မဲမပေးဘဲ နေကြကြောင်း သိရှိရသည်။
တောင်းဆိုချက်များတွင် အဓိကအားဖြင့် ထိမ်းသိမ်းခံထားရသူများအားလုံး ချက်ချင်းပြန်လွှတ်ရန်၊ လူသားချင်းစာနာသည့် အကူအညီများ လိုအပ်နေသည့် သူများထံသို့ လုံခြုံအနှောက်အယှက်ကင်းစွာရောက်ရန်၊ ကုလအဖွဲ့ဝင်နိုင်ငံအားလုံးက မြန်မာနိုင်ငံသို့ လက်နက်စီးဆင်းမှုများ တားဆီးရန်၊ မြန်မာ စစ်တပ်အနေဖြင့် ၂၀၂၀ နိုဝင်ဘာ ရွေးကောက်ပွဲ ရလဒ်တွေကို လေးစားရန် တို့ ပါဝင်ကြောင်း သိရှိရသည်။
ထို့ပြင် ငြိမ်းချမ်းစွာ ဆန္ဒပြသူတွေကို အကြမ်းဖက်နှိမ်နှင်းမှုများ ရပ်တန့်ရန်၊ အင်တာနက်နှင့်ဆိုရှယ် မီဒီယာများကို ကန့်သတ်ချုပ်ခြယ်မှုများ ရပ်တန့်ရန်လည်း တောင်းဆိုထားသည်။
ကုလသမဂ္ဂ အထွေထွေ ညီလာခံ ဆုံးဖြတ်ချက်သည် မဖြစ်မနေ လုံး၀ လိုက်နာရမည့် ဆုံး ဖြတ်ချက်မျိုး မဟုတ်သော်လည်း မြန်မာ့အရေးနှင့်ပတ်သက်၍ နိုင်ငံတကာ၏ ဆုံးဖြတ်ချက် ဖြစ်သဖြင့် နိုင်ငံရေးအရ အရေးပါလှသည်။
အလားတူ ဇွန်လ ၁၈ ရက်နေ့ အစောပိုင်းပြုလုပ်သည့် ကုလသမဂ္ဂ လုံခြုံရေးကောင်စီ ညီလာခံတွင် မြန်မာနိုင်ငံဆိုင်ရာ ကုလသမဂ္ဂ အထူးသံတမန် ခရစ်စတင်း ဘာဂနာ နှင့် အာဆီယံ ဥက္ကဌ ဘရူနိုင်နိုင်ငံ နိုင်ငံခြားရေး ဝန်ကြီးတို့ တက်ရောက် အမှာစကား ပြောကြားခဲ့သော်လည်း တစ်စုံတစ်ရာ ကြေညာချက် ထုတ်ပြန်ခြင်းမရှိပေ။
ကုလသမဂ္ဂညီလာခံ၏ ဆုံးဖြတ်ချက်သည် အကြမ်းဖက်မြန်မာစစ်ကောင်စီအတွက် နိုင်ငံတကာ အလယ်တွင် ကြီးမားသော သံတမန်ရေး ဆုံးရှုံးမှု ဖြစ်ကြောင်း နိုင်ငံရေးလေ့လာသူများက မှတ်ချက်ပြုထားသည်။
Source : KhiyThit
မြင်းခြံတွင် ယာဥ်ထိန်းရဲ ၁ ဦး သေနတ်ပစ်ခံရပြီး သေ ဆုံး
ရန်ကုန်၊ ဇွန် ၁၈
မြင်းခြံမြို့၊ အမှတ်၁၉ စွန်းလွန်းရပ်ကွက် ရတနာမိုးစတိုးဆိုင် အနီး ယနေ့ နံနက် ၁၁ နာရီ ၅၀ မိနစ်အချိန် ယာဥ်ထိန်းရဲ တစ်ဦးသေနတ်ဖြင့်အပစ်ခံရ သေဆုံး သွားကြောင်း ဒေသသတင်းရင်းမြစ် မြင်းခြံ News ၏ သတင်းဖော်ပြချက်နှင့် ဒေသခံများ၏သတင်းပေးပို့ချက်အရ သိရှိရသည်။
မြင်းခြံ Zero ပြောက်ကျားအဖွဲ့ကလည်း ယာဥ်ထိန်းရဲ ၁ ဦး ပစ်ခတ်ခံရကြောင်း ၄င်းတို့၏လူမှုကွန်ရက်စာမျက်နှာတွင် ဖော်ပြထားသည်။
လက်ရှိအချိန်တွင် အကြမ်းဖက်စစ်ကောင်စီတပ်ဖွဲ့ဝင်များ အခင်းဖြစ်ရာနေရာသို့ ရောက်ရှိနေပြီး လမ်းများပိတ်ကာ ရှာဖွေစစ်ဆေးနေသည်ဟု ဒေသခံများ၏ ပြောဆိုချက်အရ သတင်းရရှိသည်။
Photo - CJ
