ရေးမြို့နယ်တွင် စစ်ကောင်စီခန့် အုပ်ချုပ်ရေးမှူး လုပ်ကြံခံရ
ရေး၊ ဇွန် ၂၈။
မွန်ပြည်နယ်၊ ရေးမြို့နယ် နှင်းစုံကျေးရွာမှ စစ်ကောင်စီခန့် အုပ်ချုပ်ရေးမှူး စောထားဝယ် (ခ) စောဝင်းစိုးမြင့် ကို အမည်မသိလူနှစ်ဦးက ခေါ်ဆောင်သွားပြီး သေနတ်ဖြင့် ပစ်သတ်မှုဖြစ်ပွားခဲ့ကြောင်း ဒေသခံများထံမှ သတင်းရရှိသည်။
၎င်းကို ယနေ့မနက်တွင် အမျိုးသားနှစ်ဦးက ၎င်းကို ခေါ်ဆောင်သွားပြီး ရွာပြင်တွင် ပစ်သတ်ခဲ့ခြင်းဖြစ်သည်ဟု နှင်းစုံကျေးရွာက ဒေသခံများကပြောသည်။
“သူက စစ်တပ်က ခန့်ထားတဲ့ အုပ်ချုပ်ရေးမှူးပါ၊ စစ်တပ်က ခန့်ထားတာဆိုတော့ စစ်တပ်ကို သတင်းပေးမပေး ပြောစရာကိုမလိုတော့ပါဘူး” ဟု နှင်းစုံရွာသားတစ်ဦးက ပြောသည်။
စောထားဝယ်သည် ကြံ့ခိုင်ဖွံ့ဖြိုးရေးအသင်းဝင်တစ်ဦးဖြစ်ကာ စစ်တပ်၏ သတင်းပေးအဖြစ်လည်း နာမည်ထွက်နေသူဖြစ်ကြောင်း ထိုရွာသားက အတည်ပြုသည်။
ရေးမြို့နယ်အုပ်ချုပ်ရေးမှူး ဦးကိုကိုဦးကတော့ လုပ်ကြံခံထားရသူ စောထားဝယ်ကို KNU က နှင်းစုံကျေးရွာအုပ်ချုပ်ရေးမှူးအဖြစ် ခန့်ထားခြင်းဖြစ်သည်ဟု ဆိုသည်။
“ဒီဘက်က ကွပ်ကဲမှုရှိတဲ့နေရာတွေမဟုတ်ဘူး။ ခန့်တာကလည်း KNU ဘက်က ခန့်ထားတဲ့နေရာပေါ့” ဟု ဦးကိုကိုဦးက ဆိုသည်။
နှင်းစုံကျေးရွာသည် KNU တပ်မဟာ-၆နယ်မြေ ဒူးပလာယာခရိုင်အတွင်းတည်ရှိပြီး လက်ရှိတွင် အခင်းဖြစ်ရာ နေရာကို ရှာဖွေစုံစမ်းမှုများပြုလုပ်လျက်ရှိသည်။