စစ်လေယာဉ်ပျက်ကျ၍ သေဆုံးသူများထဲတွင် ပြင်ဦးလွင်မြို့တွင်တည်ဆောက်မည့် ပရိယတ္တိစာသင်တိုက်၏ အလှူ့ဒါယိကာများဖြစ်ကြသော ရွှေဖူးကုမ္ပဏီပိုင်ရှင် ဦးမြဖူးတု့ိဇနီးမောင်နှံနှင့် သားဖြစ်သူ မောင်ခန့်ဝင်းကိုတို့ပါဝင်သည်။ သို့သော် သူတို့၏အငယ်ဆုံးသားဖြစ်သူ မောင်ပိုင်ဘုန်းပြည့်မှာ ဦးခေါင်းဒဏ်ရာရရှိသည်။
ဦးမြဖူးသည် နိုင်ငံတော်သမ္မတရုံး၏ အမိန့်ကြော်ညာစာအမှတ် (၁/၂၀၂၁) အရ သာသနာတော်ဆိုင်ရာဘွဲ့တဆိပ်ဖြစ်သည့် သီဟသုဓမ္မမဏိဇောတဓရဘွဲ့ချီးမြှင့်ခြင်းခံရသူဖြစ်သည်။ အမည်ရင်းမှာ ဒေါက်တာဝင်းကိုကိုဖြစ်ပြီး ရွှေဖူးကုမ္ပဏီ၏ အုပ်ချုပ်မှူဒါရိုက်တာဖြစ်သည်။
ရွှေဖူးကုမ္ပဏီသည် ကရင်ပြည်နယ်အတွင်း ရွှေတူးဖော်ခြင်းလုပ်ငန်းများကို သမ္မတဦးသိန်းစိန်အစိုးရလက်ထက်ကတည်းက လုပ်ကိုင်နေခဲ့သည်။
ဦးမြဖူးသည် ၂၀၁၃ ခုနှစ် အောက်တိုဘာ ၁၄ ရက်နေ့က ရန်ကုန်မြို့ ထရိတ်ဒါးဟိုတယ် (ယခု ရှန်ဂရီလာ) တွင် နိုင်ငဲံခြားသူတစ်ဦးထိခိုက်ဒဏ်ရာရမှုရှိခဲ့သော ဗုံးပေါက်ကွဲမှုနှင့် အလုံမြို့နယ် Western Park Ruby စားသောက်ဆိုင်တို့တွင်မပေါက်ကွဲသေးသော ဗုံးတစ်လုံးတို့အတွက် ပါဝင်ပတ်သက်သူဟု ရဲကသံသယဖြင့် တရားစွဲခံရဖူးသည်။ ဗံဲုးဖောက်ခွဲမှုကို အခကြေးငွေယူလုပ်ဆောင်ခဲ့သူ စောမြအောင်က ဦးမြဖူးနေအိမ်တွင် တည်းခိုသွားခဲ့၍ဖြစ်သည်။
၂၀၁၅ ခုနှစ် ဇူလိုင်လဆန်းတွင် အသက် ၂၆ နှစ်အရွယ် တရားခံ စောမြင့်လွင်ကို ရန်ကုန်အနောက်ပိုင်းခရိုင်တရားရုံးက ထောင်ဒဏ် တသက်တကျွန်းနှင့် ၂၅ နှစ် ချမှတ်ခဲ့သည်။ ဦးမြဖူးနှင့် ကားမောင်းသမားကိုဇော်လတ်မောင်ကတော့ ဗုံးဖောက်ခွဲမှုတွင် ပါဝင်ပတ်သက်မှုမရှိကြောင်း တရားရုံးတော်ကတွေ့ရှိပြီး တရားရှင်နှင့်လွှတ်ပေးလိုက်သည်။
ဦးမြဖူးနှင့် ဒေါ်လဲ့လဲ့ဝင်းတို့တွင် သားသုံးဦးထွန်းကားရာ ယနေ့ ပြင်ဦးလွင်ခရီးစဉ်သို့ သားနှစ်ဦးပါလိုက်ပါသွားခဲ့ခြင်းဖြစ်သည်။
ပြင်ဦးလွင် အနီးစခန်းလေဆိပ်အနီး နံနက် ၈ နာရီခန့်က ပျက်ကျသော စစ်လေယာဉ်ပေါ်တွင် ခရီးသည်နှင့်လေယာဉ်အမှုထမ်း ၁၄ ဦးလိုက်ပါသွားရာ ၁၂ ဦး သေဆုံးခဲ့ကာ မောင်ပိုင်ဘုန်းပြည့်နှင့် တပ်ကြပ်ကြီး ကောင်စံဝင်းတို့ ဦးခေါင်းဒဏ်ရာရ၍ စစ်ဆေးရုံသို့ပို့ဆောင်ကုသမှုခံယူနေရသည်။
နေပြည်တော်ကောင်စီနယ်မြေ၊ ပျဉ်းမနားမြို့၊ ဈေးကုန်းကျောင်းတိုက်ဆရာတော် အဘိဓဇမဟာရဋ္ဌဂုရု ဘဒ္ဒန္တ ကဝိသာရ၊ အခါတော်ပေး ကုန်းဘောင် ပထမံနဝင်း ဦးအောင်တို့ပါလိုက်ပါသွားသောခရီးစဉ်သည် ပြင်ဦးလွင်မြို့နယ် သုံးတောင်ကျေးရွာအုပ်စု ကျောက်ဖျာဒိုးကျေးရွာတွင် ဆောက်လုပ်မည့် မဟာဝိသုတာရာဈေးကုန်းပရိယတ္တိစာသင်တိုက် ပန္နက်တော်တင်အခမ်းအနားကျင်းပပြုလုပ်ရန် သွားကြခြင်းဖြစ်သည်။
အမေရိကန်နိုင်ငံလုပ် Beechcraft 1900D အမျိုးအစားလေယာဉ်သည် ရာသီဥတုဆိုးရွားမှုကြောင့် ပျက်ကျသည်ဟု ဒေသအာဏာပိုင်များက အမြန်တင်ပို့သည့် အစီရင်ခံစာတွင် တွေ့ရှိရသည်။
Source: Mizzima
ပြင်ဦးလွင်အနီးစခန်းအနီးလေယာဥ်ပျက်ကျ
၁။ ဗိုလ်မှူး မိုးထက်ကျော် DSA 42
၂။ ဗိုလ်ကြီး မြင့်စိုး DSA 56
၃။ မှူး ဇော်ထူး DSA 47
၄။ ဗက စိုးဟိန်းထက် DSTA 17
၅။ တက လမင်းဝင်းသိန်း
၆။ တကက ကောင်းစံဝင်း
၇။ ဦးတေဇောဘာသ
၈။ ဦးကဝိဘာသ
၉။ ကုန်းဘောင် ပထမံနဝင်း ဦးအောင်
၁၀။ ဒေါ်ဌေးဌေးခိုင်
၁၁။ ဒေါ်လဲ့လဲ့ဝင်း
၁၂။ ဦးမြဖူး
၁၃။ မောင်ခန့်ဝင်းကို
၁၄။ မောင်ပိုင်ဘုန်းပြည့်
မောင်ပိုင်ဘုန်းပြည့်တစ်ယောက်သာ အသက်ရှင်
