မုံရွာပင်မ သပိတ်စစ်ကြောင်း မြို့လယ်ခေါင်အထိ ချီတက် သပိတ်မှောက်
ရန်ကုန်၊ဇွန် ၂၁
ယနေ့မုံရွာ ပင်မသပိတ် စစ်ကြောင်းသည် မြို့လယ်မီး ပွိုင့် အလယ်တွင်စုဝေး ကာ ဆန္ဒပြခဲ့ ကြ ပြီး မြို့တွင်းသို့ ဆိုင်ကယ်သပိတ်ဆက်လက်ချီတက်ကြသည်။
Photo- Kaung Hsu Thar
စစ်ကောင်စီတပ်ဖွဲ့ဝင်များ ပစ်သတ်လိုက်သည့် သတို့သားလောင်း ကိုကျော်ကျော်မျိုး၏ အလောင်းပြန်ရ
ရန်ကုန်၊ ဇွန် ၂၁
မန္တလေးတိုင်း၊ စဉ့်ကူးမြို့နယ်တွင် ဇွန်လ ၂၀ ရက်နေ့ ညပိုင်း မင်္ဂလာဆောင် ဖိတ်စာ သွားဖိတ်သည့် သတို့သားလောင်း ကိုကျော်ကျော်မျိုးသည် အကြမ်းဖက်စစ်ကောင်စီ တပ်များ၏ ပစ်ခတ်မှုကြောင့် ကွယ်လွန်သွားခဲ့ပြီး လက်ရှိအချိန်တွင် မိသားစုထံ အလောင်းပြန်ရောက်လာပြီဖြစ်သည်။
စဉ့်ကူးမြို့နယ်၊ လက်ပန်လှအုပ်စု၊ ငြိမ်းချမ်းအောင်ရပ်ကွက်နေ ဦးကျော်ထွေးနှင့်ဒေါ်မိုးမိုးအေးတို့၏ သားဖြစ်သူ ကိုကျော်ကျော်မျိုးသည် ၎င်း၏ သူငယ်ချင်းတစ်ဦးနှင့်အတူ ယမန်နေ့ညပိုင်း မင်္ဂလာဆောင်ဖိတ်စာများ သွားရောက်ဝေငှကြကြောင်း၊ လက်ပန်လှကျောင်းရှေ့ အရောက်တွင် စစ်ကောင်စီတပ်များက ပစ်ခတ်သဖြင့် ကိုကျော်ကျော်မျိုးသည် နေရာတွင် ပွဲချင်းပြီးသေဆုံးပြီး အဖော်လိုက်ပါလာသူ သူငယ်ချင်းကို စစ်ကောင်စီတပ်များက ရိုက်နှက်ဖမ်းဆီးသွားခဲ့သည်။
"ဒီလ ၂၄ ရက်နေ့ သူ့မင်္ဂလာဆောင်အတွက် ဖိတ်စာလိုက်ဝေတာပါ။ အဲဒါ ည ၉ နာရီ စစ်တပ်က သူတို့ စခန်းချထားတဲ့ ကျောင်းရှေ့က ဖြတ်လို့ဆိုပြီး ဆိုင်ကယ်ကို လှမ်းပစ်တာ။ နေရာမှာပဲပွဲချင်းပြီးသေတယ်။ သူ့သူငယ်ချင်းက မထိဘူး။ အဲဒါလည်း ရိုက်နှက်ပြီး ဖမ်းသွားတယ်။ အခု အလောင်းထုတ်ခွင့်မပေးဘူး။ တစ်ခါတည်း သဂြိုလ်ခိုင်းမယ်ထင်တယ်။ အခု သူ့နာရေး ယပ်တောင်တွေ ဘာတွေ သွားလုပ်နေပြီ။ သူ့ မင်္ဂလာဆောင် ဖိတ်စာလုပ်ခဲ့တဲ့ ဆိုင်မှာပဲ နာရေး ယပ်တောင်သွားလုပ်ရတယ်။ အဖြစ်ဆိုးတယ်" ဟု မိသားစုဝင်များနှင့်နီးစပ်သူ မိတ်ဆွေက ရှင်းပြသည်။
အဆိုပါဖြစ်စဉ်နှင့်ပတ်သက်၍ စဉ့်ကူးဒေသခံများက စစ်တပ်၏ ရမ်းကားမှုကို မကျေနပ်ကြဘဲ လူငယ်တစ်ဦး၏ အသက် မသေဆုံးသင့်ဘဲ သေရသည်ဟုဆိုကြသည်။
"မသင်္ကာရင်လည်း ဗျာ ဖမ်းပြီးစစ်ဆေးပေါ့။ အခုဟာက ဘာမှ မပြောဘဲ ဖြတ်သွားတဲ့ ဆိုင်ကယ်ကို လှမ်းပစ်တာကြီးက အတော်ကြီး လွန်တယ်။ ဒီကောင်လေးက ရည်ရည်မွန်မွန် လူချစ်လူခင်လည်းပေါတယ်။ သူ့မင်္ဂလာဆောင်အတွက် သူပျော်နေတာဗျာ။ ဖိတ်စာတွေ လိုက်ဖိတ်ပြီး သူ့ မင်္ဂလာဆောင် လာနော်။ မလာရင်စိတ်ဆိုးမှာလို့တောင် နောက်နေသေးတယ်။ ပြည်သူ့ဘဝတွေက မလုံခြုံလိုက်တာ" ဟု မြို့ခံတစ်ဦးက ပြောဆိုသည်။
ကယားပြည်နယ် လက်ရှိအခြေအနေ
ပြီးခဲ့တဲ့ ဇွန်လ ၁၅ရက်နေ့ ရက်စွဲနဲ့ KNDF ဘက်က ထိုးစစ်ဆင်တာတွေယာယီရပ်ဆိုင်းမယ်လို့ ထုတ်ပြန်ပြီးတဲ့နောက်မှာ လွိုင်ကော်မြို့ကို တခြားပြည်နယ်တွေကနေ ပြန်လည်ဝင်ထွက်ခွင့်ပြုပေမယ့် မြို့အဝင်တွေမှာတော့ စစ်ကောင်စီဘက်က စစ်ဆေးမေးမြန်းတာတွေရှိနေပါတယ်။ တခြားမြို့တွေဆီပြေးဆွဲတဲ့ အဝေးပြေးကားတွေလည်း တစ်စီးတစ်လေ ပြန်ထွက်နေပါပြီ။ မြို့ပေါ်မှာတော့ စျေးတွေနဲ့ ဆိုင်တော်တော်များများဟာလည်း ပုံမှန်ပြန်ဖွင့်နေပါပြီ။ ပြီးခဲ့တဲ့ ဇွန်လ ၁၉ရက်နေ့ညက လွိုင်ကော်မြို့ ချိကယ်ရပ်ကွက်အနီးအနားတစ်ဝိုက်နဲ့ လွိုင်လင်လေးဘက်မှာ သေနတ်သံတချို့ ကြားရတယ်လို့ ဒေသခံတွေဆီကသိရပြီး ဘယ်ဘက်က ပစ်တာလဲဆိုတာကိုတော့ မသိရှိရသေးပါဘူး။ မြို့ပေါ်မှာ စစ်ကောင်စီတပ်တွေ တပ်စွဲထားတဲ့ ပြည်နယ်ခန်းမအနီးအနားဝန်းကျင်တစ်ခုလုံးကို ဖြတ်သန်းသွားလာခွင့် ပိတ်ပင်ထားဆဲဖြစ်ပါတယ်။
ဒီမောဆို၊ ငွေတောင်၊ ဒေါငံခါးနဲ့ ၆မိုင်စံပြကျေးရွာတွေကတော့ စစ်ဘေးဒဏ်ကြောင့် အထိအခိုက်အပျက်အစီးများပြီး ပြည်သူအနည်းအကျဥ်းသာ စစ်ဘေးရှောင်နေရာတွေကနေ နေအိမ်တွေဆီပြန်လည်နေထိုင်နေကြတာဖြစ်ပါတယ်။ ကျန်ရှိနေသေးတဲ့ ပြည်သူအများစုကတော့ စစ်ဘေးရှောင်နေရာတွေမှာပဲ ဆက်လက်နေထိုင်နေကြရပါတယ်။ ၆မိုင်စံပြကျေးရွာအဝင်နဲ့ ငွေတောင်ဆည်အနီး ဒီမောဆိုလမ်းဆုံတွေမှာ စစ်ကောင်စီတပ်တွေက စစ်ဆေးရေးဂိတ်တွေထားရှိပြီး မြို့အဝင်အထွက်မှန်သမျှကို စစ်ဆေးနေတာဖြစ်ပါတယ်။ ပြည်သူတွေဟာစစ်ဘေးဒဏ်တွေအပြင် သူတို့ရဲ့နေအိမ်၊ ဆိုင်ခန်းတွေကိုသူခိုးတွေက စင်းလုံးကားတွေနဲ့လာပြီး အိမ်ရှင်ယောင်ဆောင်ကာ ဆိုင်ကယ်၊ ရေခဲသေတ္တာ၊ အဝတ်လျော်စက်၊ ဗီဒို အစရှိတဲ့ ပိုင်ဆိုင်မှုတွေ ခိုးယူခံနေရတယ်လို့လည်း သိရပါတယ်။ ငွေတောင်ကျေးရွာဒေသခံတွေကတော့ လိုအပ်တဲ့ပစ္စည်းတွေသာ ပြန်လာယူကြပြီး ကျေးရွာအတွင်း ပြန်လည်နေထိုင်ခြင်း မရှိသေးပါဘူး။
အပျက်အစီးတွေနဲ့ ဆုံးရှုံးမှုတွေဟာ ပြန်လည်ထူထောင်နိုင်ဖို့အတွက် အလှမ်းဝေးနေသေးသလို နှစ်ဖက်အပစ်အခတ်ယာယီသာရပ်ဆိုင်းထားတာကြောင့် ကယားပြည်နယ်ကပြည်သူတွေဟာ စိုးရိမ်စိတ်တွေနဲ့ပူပန်သောက ရောက်နေကြဆဲဖြစ်ပါတယ်။
#savekayah
#paunglaungmedia
တာမွေမှာ ပေါက်ကွဲမှု နှစ်ခုဖြစ်
ရန်ကုန်မြို့ တာမွေမြို့နယ်က မအူကုန်းလမ်းကျယ်မှာ ပေါက်ကွဲမှု နှစ်ခုဖြစ်ခဲ့တယ်လို့ ကနဦးသတင်းရရှိထားပါတယ်။
ဒီပေါက်ကွဲမှုဟာ ၁၃၅ လမ်းက အုပ်ချုပ်ရေးမှူးရုံး ပေါက်ကွဲတာဖြစ်တယ်လို့ တာမွေမြို့နယ်မှာ နေထိုင်သူတွေက လူမှုကွန်ယက်မှာ ဖော်ပြထားပေမယ့် အတည်မပြုနိုင်သေးပါဘူး။
၈ နာရီ ၅၅ မိနစ်ကစလို့ တာမွေ ယုဇနပလာဇာရှေ့မှာ ဖြတ်သွားတဲ့ကားတွေကို စစ်ကောင်စီတပ်တွေက စစ်ဆေးနေပါတယ်။
ဓာတ်ပုံ - CJ
သံလွင်ခက် - Than Lwin Khet News