အကြမ်းဖက်စစ်ကောင်စီ အင်အား ၄၀၀ ဝန်းကျင် ဒီးမော့ဆိုဘက် ဝင်လာနေ၊ ကလလတ နှင့် ကယန်းပြည်သစ်ပါတီတို့မှ လုံခြုံရေးယူပေး (video)
ရန်ကုန်၊ ဇွန် ၉
အကြမ်းဖက်စစ်ကောင်စီတပ်သားအင်အား ၄၀၀ ဝန်းကျင်သည် ဇွန်လ ၉ ရက် မွန်းလွဲ ၁ နာရီခန့်တွင် ရှမ်းပြည်နယ်တောင်ပိုင်း ဖယ်ခုံမြို့နယ်၊ ဆီဘူးကျေးရွာကိုဖြတ်ကာ ကယားပြည်နယ် ဒီးမော့ဆိုမြို့ အနောက်ခြမ်းသို့ ဝင်ရောက်လာနေကြောင်း သတင်းရရှိသည်။
"အင်အား ၄၀၀ ကျော်ရှိမယ်၊ စစ်ကားအကြီး ၈ စီး ပါတယ်၊ အခုကို ဆီဘူးကနေ ဖြတ်သွားနေတာ" ဟု ဒေသခံတစ်ဦးမှ ရန်ကုန်ခေတ်သစ်သို့ အတည်ပြုပြောဆိုသည်။
အာဏာသိမ်း စစ်ကောင်စီတပ်ဖွဲ့များသည် တောင်ငူ - သံတောင်ကြီး - ဆီဘူး လမ်းမှတဆင့် ကယားပြည်နယ်ထဲသို့ ဝင်လာကြောင်း KNDF မှ သတင်းထုတ်ပြန်ထားသည်။
အဆိုပါ အကြမ်းဖက်စစ်ကောင်စီ စစ်ကြောင်းကို ကရင်နီလူမျိုးပေါင်းစုံ ပြည်သူ့လွတ်မြောက်ရေးတပ်ဦး (ကလလတ) နှင့် ကယန်းပြည်သစ်ပါတီတို့မှ လုံခြုံရေးယူပေးထားကြောင်း သိရသည်။
"ကလလတနဲ့ ကယန်းပြည်သစ်က အဲ့ဒီစစ်ကြောင်းကို လုံခြုံရေးယူပေးတယ်၊ သူတို့နယ်မြေကို ဖြတ်တော့ လုံခြုံရေးယူပေးတဲ့ သဘောပဲ၊ အဲဒီအဖွဲ့တွေက ပြည်သူကို သစ္စာဖောက်တဲ့အဖွဲ့တွေ" ဟု KNDF အဖွဲ့ဝင်တစ်ဦးမှ ပြောသည်။
လက်ရှိအချိန်တွင် မိုးဗြဲ၊ လွိုင်ကော်၊ စံပြခြောက်မိုင်ကျေးရွာ၊ ဒီးမော့ဆိုမြို့များတွင် အကြမ်းဖက်စစ်ကောင်စီတပ်နှင့် ကရင်နီအမျိုးသားကာကွယ်ရေးတပ်ဖွဲ့ KNDF တို့ကြား တိုက်ပွဲပြင်းထန်နေပြီး ဖက်ဆစ် စစ်တပ်မှ ပစ်ခတ်သော လက်နက်ကြီး ထိမှန်ပြီး လူနေအိမ်များ ထိခိုက်ပျက်စီးခဲ့သည်။
