ကလေးမြို့မှ အဖမ်းခံရသည့် ၁၅ နှစ်သား ၂၄ နာရီအတွင်း သေဆုံး
Source: Myanmarnow
ကလေးမြို့မှ အသက် ၁၅နှစ်အရွယ် မောင်ကျော်မင်းခန့်ကို အာဏာသိမ်းစစ်ကောင်စီ တပ်သားများက ယမန်နေ့ ဇွန် ၁၉ ညက ဖမ်းဆီးသွားပြီး ယနေ့တွင် အလောင်းလာထုတ်ရန် မိသားစုထံ ဆက်သွယ်လာကြောင်း ဒေသခံတစ်ဦးက ပြောသည်။
“မနေ့ညက (ကျော်မင်းခန့်) အဖမ်းခံရပြီးတော့ အခု အလောင်းလာထုတ်လို့ ပြောတယ်တဲ့ သူ့မိဘတွေကို။ အခု သူတို့နဲ့ နီးစပ်တဲ့သူက ပြောလာတာ။ ဘာကြောင့်ဖမ်းတာလဲတော့ သေချာမသိရသေးဘူး။ အဲဒါ အခု ၂ နာရီမှာ အလောင်းလာထုတ်ဖို့ ပြောလာတယ်လို့ ပြောတယ်” ဟု ဒေသခံတစ်ဦးက ယနေ့မွန်းလွဲပိုင်း၌ ပြောသည်။
ကလေးမြို့ ချမ်းမြအောင်စည်ရပ်ကွက်၌ နေထိုင်သူ မောင်ကျော်မင်းခန့်သည် စစ်အာဏာရှင်ဆန့်ကျင်ရေးဆန္ဒပြပွဲများ၌ လိုက်ပါလေ့ရှိသူတစ်ဦးဟု သိရကြောင်း အထက်ပါဒေသခံက ပြောသည်။
တချိန်တည်းတွင် အဖမ်းခံရသည့် မြန်မာ့စီးပွားရေးဘဏ် CDM ၀န်ထမ်းတစ်ဦးနှင့် သူ၏ ၁၂နှစ်အရွယ် ကလေးငယ်ကိုမူ ပြန်မလွှတ်သေးဟု သိရသည်။
ည ၉နာရီခန့်ကလည်း အင်းယားကုန်းရပ်ကွက်ရှိ နေအိမ်တစ်အိမ်ကို စစ်ကောင်စီတပ်က ဝင်ရောက်စီးနင်းပစ်ခတ်ခဲ့၍ အိမ်ပိုင်ရှင် သားအဖနှစ်ဦးအပါအဝင် ၄ ဦးသေဆုံးပြီး အမျိုးသမီးတစ်ဦးဒဏ်ရာရခဲ့သည်ဟု ဒေသခံအချို့က ပြောသည်။
“မိသားစုက သုံးယောက်နေတာ၊ အဲဒီမှာ ဧည့်သည်က နှစ်ယောက်ပါတယ်။ သူတို့က ဝင်မွှေတဲ့အချိန်မှာ တစ်ယောက်က အော်လိုက်တာ။ အော်လိုက်ပြီးတော့ ထွက်ပြေးတဲ့အချိန်မှာ ပစ်သတ်လိုက်တာလို့ ပြောတယ်။ သားအဖနှစ်ယောက်သေပြီး ကောင်မလေးတစ်ယောက် မျက်စိမှန်သွားတယ်။ ဧည့်သည်နှစ်ယောက်လည်း ပစ်သတ်ခံရတယ်ပြောတယ်” ဟု ဒေသခံတစ်ဦးက ပြောသည်။
အဆိုပါအိမ်ကို မည်သည့်အတွက် ဝင်ရောက်စီးနင်းသည်ကိုမူ မသိရသေးကြောင်း ထိုဒေသခံက ဆက်ပြောသည်။
ဇွန် ၁၉ ည ကလေးမြို့ပစ်ခတ်မှု၊ ဖမ်းဆီးမှုများနှင့် ပတ်သက်ပြီး မှတ်ချက်တောင်းရန် စစ်ကောင်စီပြန်ကြားရေးတာဝန်ရှိသူတို့ကို ဆက်သွယ်၍ မရသေးပေ။
စစ်ကိုင်းတိုင်း ကလေးမြို့ဒေသခံတို့သည် အာဏာသိမ်းစစ်ကောင်စီကို နေ့စဉ် နည်းမျိုးစုံဖြင့် ဆန့်ကျင်အံတုလျက်ရှိသည်။
ဗဟန်းတွင် ၁၃ နှစ်အရွယ် မောင်ဖိုးစိန်ကို စစ်တပ်က ပစ်ခတ်ပြီး ဆေးရုံမပို့ဘဲ ဓာတ်တိုင်ဘေးချထားစဉ် သေဆုံး၊ ဖမ်းဆီးခံရသူ သက်ပိုင်ထူး (ခ) အလီလည်း စစ်ကြောရေးတွင် သေဆုံး
Source: KhitThit ရန်ကုန်၊ ဇွန် ၂၀
ရန်ကုန်တိုင်း၊ ဗဟန်းမြို့နယ်တွင် ယမန်နေ့ ည ၁၂ နာရီဝန်းကျင် အသက် ၁၃ နှစ်အရွယ် မောင်ဖိုးစိန်ကို စစ်တပ်က ပစ်ခတ်ပြီး ဒဏ် ရာရရှိနေစဉ် ဓာတ်တိုင်ဘေးတွင် မီထားစဉ် ရရှိဒဏ်ရာဖြင့် မောင်ဖိုးစိန်မှာ သေ ဆုံးသွားကြောင်း ဒေသခံများထံမှ သိရှိရသည်။
ဗဟန်းမြို့နယ် ငါးထပ်ကြီး တောင်ရပ်ကွက်က ဆာဖိုးသာခြံလမ်းထဲသို့ ဇွန်လ ၁၉ ရက်နေ့ ည ၁၂ နာရီတွင် အကြမ်း ဖက် စစ်ကောင်စီတပ်များက ဝင်ရောက်လာကြောင်း၊ အဓိကအားဖြင့် စစ်ကောင်စီက ၎င်းတို့ ဖမ်းမိထားသည့် လူငယ်တစ်ဦး၏ ထွက်ဆိုချက် အပေါ် အခြေခံ၍ သပိတ်ကာလ Defense လိုင်းတွင် ပါဝင်သည်ဟုဆိုကာ အလီ(ခ) သက်ပိုင်ထူးကို ဖမ်းရန် လာရောက်ခြင်းဖြစ်ကြောင်း၊ မူလက မဖမ်းမိသော်လည်း နောက် ပိုင်းတွင် ထပ်မံ ရှာဖွေဖမ်းသဖြင့် မိသွားကြောင်း၊ ယင်းသို့ ဖမ်းမိပြီးနောက် အလီကို သေလုမြောပါးရိုက်နှက်ပြီး ရပ်ကွက်အတွင်းမှ လူငယ်များကို စစ်တပ်က ဖမ်းရန် ပြောဆိုကြောင်း၊ ယင်းအချိန်တွင် ဆော့ကစားနေသူ ကလေး တစ်အုပ် ရှိနေပြီး စစ်တပ်က ဝင်ရောက် လာ၍ ထွက်ပြေးကြကြောင်း၊ စစ်တပ်က ပစ်ခတ်၍ အသက် ၁၃ နှစ်အရွယ် မောင်ဖိုးစိန် နောက်ကျော သေနတ်ထိမှန်သွားကြောင်း သိရှိရသည်။
"သက်ပိုင်ထူး(ခ)အလီကိုကြိုးတုပ်ပြီး သွေးချင်းချင်းနီနေအောင်ရိုက်တယ်။ ပြီးမှ ဆာဘိုးသာရပ်ကွက်ထဲကို ရိုးရိုးမဝင်ဘဲ တွေ့တဲ့ကောင် အကုန်ဖမ်းဆိုပြီးတော့အော်ပြီးဝင်တာ။ အဲ့မှာ Bingo ကစားနေတဲ့ ကလေးအုပ်ကကြောက်ပြီးပြေးတာ။ အဲဒါကို ပစ်ဆိုပြီး ပစ်တာ အနီနဲ့ကောင်လေး မောင်ဖိုးစိန် နောက် ကျောကို မှန်တယ်။ ကလေးပုံကျသွားတော့မှ မင်းသတိရသေးလား၊ မင်းသတိရှိသေးလားလို့ မေးမေးပြီး ဓာတ်တိုင်နားကို ခေါ်လာတယ်။ ဓာတ်တိုင်နားလေးမှာပဲ မီထားတုန်း မောင်ဖိုးစိန် အသက်ထွက်သွားတာ" ဟု ဖြစ်စဉ်ကို သေချာ သိရှိထားသူ ဒေသခံတစ်ဦးက ဆိုသည်။
စစ်ကောင်စီက ဖမ်းဆီးသွားသော အလီ(ခ) သက်ပိုင်ထူးမှာလည်း စစ်ကြောရေးတွင် ယနေ့ သေဆုံးသွားပြီး ဇွန်လ ၂၁ ရက်နေ့ အလောင်းလာထုတ်ယူရန် မိသားစုထံသို့ အကြောင်းကြား ထားကြောင်း သိရှိရသည်။
"အလီက စစ်ကြောရေးမှာ ဆုံးတယ်။ အခုအလောင်းထုတ်ဖို့စီစဉ်နေပါတယ်။ ဖမ်းတာက နံချပ်ကူတွေ့လို့ဆိုပြီးဖမ်းတာပါ။ အလီအိမ်မှာရှိတဲ့ငွေတွေလည်းယူသွားတယ်။ အိမ်က ပိုက်ဆံ အကုန်သိမ်းတယ်။ မိဘတွေကိုမနက်ဖြန်အလောင်းလာထုတ်ဖို့မှာတယ်။ အလီကိုရိုက်နှက်လက်ပြန်ကြိုးတုတ်ပြီး အခြားလူတွေကို လိုက်ရှာခိုင်းတယ်။ အိမ်မှာနံချပ်ကူ တွေ့လို့ Defence လိုင်းမှာပါတယ်ဆိုပြီးစွပ်စွဲတာ။ တကယ်က အလီ ရဲ့ ဦးလေးက ကရာတေးသမား။ ဒါကြောင့်အိမ်မှာ နံချပ်ကူရှိတာပါ" ဟု ဒေသခံတစ်ဦးက ရှင်းပြသည်။
လက်ရှိတွင် စစ်ကောင်စီတပ်၏ ပစ်ခတ်မှုကြောင့် သေဆုံးသူ မောင်ဖိုးစိန် အသက် ၁၃ နှစ်နှင့် မောင်သက်ပိုင်ထူး(ခ) အလီ အသက် ၂၇ နှစ်တို့ ၏ နာရေးအတွက် ပြင်ဆင်နေကြ ကြောင်း သိရှိရသည်။
စစ်ကြောရေးတွင် သေဆုံးသူ သက်ပိုင်ထူး(ခ) အလီသည် မလေးရှားနိုင်ငံမှ မကြာသေးမီက ပြန်လာသူဖြစ်ပြီး မိသားစုမှာလည်း ငွေကြေးချမ်းသာသူများဖြစ်ကြောင်း သိရှိရသည်။
ဓာတ်ပုံ- နောက်ကျော သေနတ်ထိမှန်ပြီးနောက် ဆေးရုံမပို့ဘဲ ဓာတ်တိုင်တွင် မီနေရသော မောင်ဖိုးစိန်။ ခဏအကြာတွင် ကွယ်လွန်သွားခဲ့သည်။
ဓာတ်ပုံ- သက်ပိုင်ထူး(ခ) အလီ
