လှိုင်မြို့နယ်၊ ၁၃ ရပ်ကွက်တွင် စစ်ကောင်စီသတင်းပေးဟု အများက သတ်မှတ်ခံထားရသူ လက်ဖက်ရည်ဆိုင်ပိုင်ရှင် သေနတ်ပစ်ခံရပြီး သေဆုံး
ရန်ကုန်၊ ဇွန် ၂၃
ရန်ကုန်တိုင်း၊ လှိုင်မြို့နယ်၊ ၁၃ ရပ်ကွက်၊ သီရိမြိုင် ၁၀ လမ်းတွင် စစ်ကောင်စီသတင်းပေးဟု အများက သတ်မှတ်ခံထားရ သူ အရုဏ်ဦး လက်ဖက်ရည်ဆိုင်ပိုင်ရှင် ဦးကျော်အေး သည် ယနေ့ နံနက် ၆ နာရီ ၄၅ မိနစ်တွင် ပစ်ခတ်ခံရပြီး သေဆုံးသွားကြောင်း ဒေသခံများထံမှ သိရှိရသည်။
"သူက စစ်ကောင်စီသတင်းပေးဆိုတာ လူတိုင်းက သိထားတယ်။ ဒလန်လုပ်တယ်ပေါ့။ သီရိမြိုင် ၁၀ လမ်းမှာ သေနတ်နဲ့ အပစ်ခံရပြီး ဆုံးသွားတယ်။ ရဲတွေ၊ စစ်သားတွေကတော့ အလောင်းကို လာသယ်သွားပြီ။ ပွဲချင်းပြီး ဆုံးတာပါ" ဟု ဒေသခံတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။
လှိုင်မြို့နယ်၊ ၁၃ ရပ်ကွက်တွင် ဆန္ဒပြပွဲပါဝင်သူများနှင့် စစ်အာဏာရှင် ဆန့်ကျင်ရေး လှုပ်ရှားသူများကို ဦးကျော်အေးက စစ်ကောင်စီထံသို့ သတင်းပေးခဲ့သဖြင့် ဖမ်းဆီးခံရသူ အများအပြား ရှိခဲ့သည်ဟုလည်း ဒေသခံများက ဆိုကြသည်။
ကိုဗစ်ဖြစ်နေသည့် CDM စစ်ဗိုလ်နှင့် အမတ်ဟောင်းကို စစ်ကောင်စီဖမ်း
ကိုဗစ်နိုင်တင်းကပ်ရောဂါကြောင့် ဆေးကုနေသည့် အာဏာဖီဆန်ရေးလှုပ်ရှားမှု (CDM)တွင် ပါဝင်နေသော စစ်ဗိုလ်နှင့် လွှတ်တော်ကိုယ်စားလှယ်ဟောင်း အပါအဝင် စုစုပေါင်းလေးဦးကို စစ်ကောင်စီက မန္တလေးမြို့၌ ဖမ်းဆီးသွားသည်။
ရွေးကောက်ပွဲနှင့် လွှတ်တော်စောင့်ကြည့်လေ့လာရေး အရပ်ဖက်အဖွဲ့အစည်းတစ်ခုဖြစ်သည့် ကနောင်အင်စတီကျု့၏ ရုံးကို ဇွန် ၂၁၊ ည ၁၁ နာရီဝန်းကျင်က စစ်ကောင်စီတပ်က ဝင်ရောက်စီးနင်းစဉ် ထိုသို့ ဖမ်းဆီးခံရခြင်းဖြစ်သည်။
“ကိုဗစ်ဖြစ်တော့ သူတို့လည်း ဆေးကုသစရာနေရာမရှိဘူး။ လောလောဆယ် ယာယီဆေးကုဖို့ဆိုပြီး ရုံးမှာနေကြတာ”ဟု ကနောင်အင်စတီကျု့တာဝန်ခံတစ်ဦးက Myanmar Now ကို ပြောသည်။
စစ်ကောင်စီဖမ်းသွားသူများမှာ ဗိုလ်စိုးဝေလှိုင်၊ လွှတ်တော်ကိုယ်စားလှယ်ဟောင်းတစ်ဦးနှင့် ကနောင်အင်စတီကျုမှ ဝန်ထမ်းနှစ်ဦးတို့ဖြစ်သည်။
၎င်းတို့တွင် ကိုဗစ်နိုင်တင်းလက္ခဏာအချို့ပေါ်ပေါက်နေ၍ ပြီးခဲ့သည့် ရက်သတ္တပတ်အတွင်း Rapid Test Kit (ရောဂါရှိမရှိစမ်းသပ်သည့်ကိရိယာ) ဖြင့် စမ်းသပ်စစ်ဆေးစဉ် ကူးစက်ခံထားရသည်ဟု အဖြေထွက်ထားသူများဖြစ်ကြောင်း အထက်ပါပုဂ္ဂိုလ်ကပင် အတည်ပြုသည်။
လက်ရှိတွင် ဖမ်းဆီးခံထားရသူ လေးဦးစလုံး မန္တလေးနန်းတွင်း၌ စစ်ကြောခံနေရဆဲဖြစ်ကြောင်း သတင်းရထားသော်လည်း အသေးစိတ်ကိုမူ စုံစမ်း၍မရသေးဟု ၎င်းက ဆက်ပြောသည်။
ဗိုလ်စိုးဝေလှိုင်သည် မန္တလေးအခြေစိုက် ပြည်သူ့ကာကွယ်ရေးတပ်ဖွဲ့ (MPDF)ကို သင်တန်းပေးနေသူဖြစ်ကြောင်း၊ ဇွန် ၂၂ နံနက်ပိုင်း MPDF ရုံးခန်းတစ်ခုကို ဝင်စီးနိုင်ရန် သတင်းပေးခဲ့သူဖြစ်ကြောင်း ရေးသားပြောဆိုချက်များနှင့် ပတ်သက်ပြီး ကနောင်အင်စတီကျုတာဝန်ရှိသူက ငြင်းဆိုသည်။
“ဒီလူတွေက ဘယ် PDFနဲ့မှလည်း အဆက်သွယ်မရှိဘူး။ ဘယ်အဖွဲ့ကိုမှ သင်တန်းပေးနေတာမရှိပါဘူး။ ကိုဗစ်လက္ခဏာတွေဖြစ်နေတော့ ရုံးမှာပဲ ကွာရန်တင်းနေတဲ့သဘောမျိုးနေတဲ့အချိန်မှာ ပါသွားတယ်”ဟု ၎င်းက ပြောသည်။
အဆိုပါဖြစ်စဉ်နှင့် စပ်လျဉ်း၍ စစ်ကောင်စီဘက်က ဇွန် ၂၃ ညနေပိုင်းအထိ သတင်းထုတ်ပြန်ခြင်း မရှိသေးပေ။
ဖေဖော်ဝါရီ ၁ အာဏာသိမ်းပြီးနောက် ငါးလနီးပါးရှိလာချိန်အတွင်း စစ်ကောင်စီလက်ချက်ဖြင့် လူပေါင်း ၉၀၀ နီးပါးသေဆုံးကာ ၆၀၀၀ ကျော် ဖမ်းဆီးခံထားရသည်ဟု နိုင်ငံရေးအကျဉ်းသားများကူညီစောင့်ရှောက်ရေးအသင်း(AAPP)က ထုတ်ပြန်ထားသည်။
စစ်ကောင်စီကမူ ၃၀၀ ခန့်သာ သေသည်ဟု ဆိုသည်။