စစ်သားများ ပစ်ခတ်၍ ၉ တန်းကျောင်းသားအပါအဝင် ၁၁ ဦးခန့်သေဆုံး၊ ရွာခံများဘေးလွတ်ရာရှောင်တိမ်းနေရ
======================
ဝေယံမိုး - မဇ္ဈိမ
ဂန့်ဂေါနယ်မှ ကျေးရွာလုံခြုံရေးအဖွဲ့များနှင့် စစ်ကောင်စီတပ်သားများ အပြန်အလှန်ပစ်ခတ်မှုတွင် ကိုးတန်းကျောင်းသား တစ်ဦးအပါအဝင် ဒေသခံ ၁၁ ဦးကျဆုံးကာ နေအိမ် အလုံး၂၀ ခန့်မီးရှို့ခံရကြောင်းသိရသည်။
မကွေးတိုင်းဒေသကြီး ၊ဂန့်ဂေါမြို့နှင့် မိုင် ၄၀ ခန့်အကွာရှိ မြင်သားကျေးရွာသို့ စက်တင်ဘာ ၉ ရက် နံနက် ၁၀ နာရီအချိန်တွင် စစ်ကောင်စီတပ်သား ၅၀ ခန့် ရောက်ရှိလာပြီး ဝင်ရောက်စီးနင်းရာမှ ပစ်ခတ်မှုများ ဖြစ်ပွားခြင်းဖြစ်သည်။
ပစ်ခတ်မှုများမှာ ယမန်နေ့ နံနက် ၁၀နာရီမှ ညနေ သုံးနာရီဝန်းကျင်အထိ ပစ်ခတ်မှုများရှိခဲ့ကြောင်း ဒေသခံများကဆိုသည်။
“စစ်သားတွေ ရွာထဲဝင်လာကတည်းက လက်နက်ကြီးတွေရော၊ သေနတ်တွေနဲ့ရောပစ်ကြတာပါပဲ။ ရွာမှာက လုံခြုံရေးအဖွဲ့ ဖွဲ့ထားတာရှိတယ်။ အဲဒီကလူငယ်လေးတွေကလည်း ရှိတဲ့လက်နက်နဲ့ပြန်ပစ်ကြတာ၊ ညနေ ၃ နာရီလောက်ထိခံပစ်ကြတာ၊ နောက်မိုးတွေရွာလာတော့ဘယ်လိုမှပစ်လို့မရတော့ နောက်ဆုတ်ပေးလိုက်ရတာ၊ ကျွန်မမောင်လေးအပါအဝင် ၁၁ ယောက်ကျသွားတယ်။ ပြီးတော့ ရွာတောင်ပိုင်းက အိမ်တွေကို မီးရှို့တယ်။ မနေ့ကထိ ၁၁ လုံး ဒီနေ့ရောဆို အလုံး ၂၀ ကျော်ပြီ” ဟု ဒေသခံတစ်ဦးက ဆိုသည်။
သေဆုံးသူများထဲတွင် ကိုးတန်းတက်ရန်စောင့်ဆိုင်းနေသည့် အသက် ၁၆ နှစ်အရွယ် မောင်ငြိမ်းစည်သူ လည်းပါဝင်ပြီး အများစုမှာ ၁၈ နှစ်ဝန်းကျင်လူငယ်များဖြစ်သည်။
ဒေသခံများ၏ အတည်ပြုချက်အရ ကျဆုံးသူများထဲတွင်ည ကိုရှိန်ဘုန်းနိုင်၊ ကိုငြိမ်းစည်သူ၊ ဦးကျော်ဆန်း၊ ကိုခက်နိုင်ဦးနှင့် ကိုပြည့်ဖြိုးဝင်း တို့ပါဝင်ေကြာင်း သိရသည်။ စစ်ကောင်စီတပ်သားများဘက်မှ ထိခိုက်ကျဆုံးမှုအား အတည်မပြုနိုင်သေးပေ။
ကျဆုံးသူများထဲမှ အခြားသူများ၏ အမည်များကို အတည်ပြုနိုင်ရန်ဆက်လက်စုံစမ်းနေဆဲဖြစ်သည်။
လက်ရှိအချိန်အထိ ကျဆုံးသူများ၏ ရုပ်အလောင်းများအား ကောက်ယူနိုင်ခြင်းမပြုနိုင်သေးပေ။
ကျေးရွာမှ သက်ကြီးရွယ်အိုအချို့နှင့် နာမကျန်းသူ၊ ကလေးသူငယ်များ ရွာဦးဘုန်းကြီးကျောင်းတွင် ရှောင်တိမ်းနေစဉ် စစ်သားများက ဘုန်းကြီးကျောင်းဝန်းအတွင်းဝင်ရောက်ကာ ဆရာတော်များ၏ ဖုန်းများကို ရိုက်ခွဲခဲ့ကြောင်းသိရသည်။
နှမ်းရိတ်သိမ်းချိန်တွင် စစ်သားများရုတ်တရက် ရောက်လာခြင်းမှာ ကျေးရွာအတွင်းမှ ဒလန်များသတင်းပေးခြင်းကြောင့်ဟု ဒေသခံအချို့က သုံးသပ်သည်။
“ကျွန်မတို့ ရွာက NLD ထောက်ခံသူတွေများတယ်။ အခြားဒလန်ရှင်းတာတို့ဘာတို့လည်းမလုပ်ဘူး။ ဒါကို သူတို့က အတင်းဝင်ပစ်ကြတာ၊ လက်နက်ကလည်းမမျှဘူးဆိုတော့ ရွာကလူငယ်လေးတွေ အသက်စွန့်လိုက်ရတာ၊ တစ်သက်မကျေဘူး။ စိတ်နာတယ်။ ဒီစစ်သားတွေကို တွေ့တဲ့နေရာမှာသတ်ချင်တယ်” ဟု ဒေသခံတစ်ဦးကပြောသည်။
အိမ်ခြေ ၅၀၀ကျော် ရှိသည့် မြင်သားရွာမှ ဒေသခံများသည် လက်ရှိအချိန်တွင် ဘေးလွတ်ရာသို့ထွက်ပြေးတိမ်းရှောင်နေကြရသည်ဟု သိရသည်။