စစ်ကောင်စီတပ်သားများက ဆလုံကျွန်းပေါ်တက်ပြီး ရွာသားများကို ဖမ်းဆီးမှုများပြုလုပ်နေ
တနင်္သာရီ။ ဇူလိုင် ၂၈
ဆလုံနှင့် အခြားဌာနေ တိုင်းရင်းသားများနေထိုင်သည့် မကြုံကလက်ကျေးရွာသို့ ရေတပ်မှ သင်္ဘောတစ်စီး ရောက်လာပြီး ဖုန်းထဲက ဓါတ်ပုံများနှင့် လူများကို တိုက်ဆိုင်စစ်ဆေးကာ ဖမ်းဆီးမှုများပြုလုပ်လျက်ရှိကြောင်း ဒေသခံရွာသားများက BAP ကို ပြောသည်။
တနင်္သာရီတိုင်းဒေသကြီး ကော့သောင်းမြို့၏ အနောက်ဘက် လန်ပိကျွန်းအဏ္ဏဝါအမျိုးသားဥယျာဉ်အနီး က မကြုံကလက်ကျေးရွာတွင် နေထိုင်သူများသည် စစ်တပ်က အာဏာသိမ်းပြီးနောက် စစ်အာဏာရှင် ဆန့်ကျင်ရေးလှုပ်ရှားမှုများတွင် အစဉ်တစိုက် ပါဝင်ခဲ့သူများဖြစ်သည်။
ပြီးခဲ့သည် ဇူလိုင် ၂၄ ရက်ညပိုင်းကလည်း မြန်မာနိုင်ငံရှိ အကျဉ်းထောင်အသီးသီးတွင် ချုပ်နှောင်ခံထားရသည့် နိုင်ငံရေးအကျဉ်းသားများကို ပြန်လွှတ်ပေးရန် အဆိုပါကျေးရွာ၏ ရွာသားအချို့က ဆန္ဒပြတောင်းဆိုခဲ့ကြသည်။
ဆန္ဒပြပြီးနောက်မူ သတင်းဌာနအချို့က ၎င်းတို့၏မျက်နှာများပါဝင်သည့်ဓါတ်ပုံများကို ထင်ထင်ရှားရှားဖော်ပြခဲ့သဖြင့် စစ်တပ်က ကျေးရွာသို့လာရောက်ကာ ဓါတ်ပုံဖြင့် တိုက်ဆိုင်စစ်ဆေးနေခြင်းဖြစ်ကြောင်း ရွာသားတစ်ဦးက ဆိုသည်။
“ပြီးခဲ့တဲ့ တစ်နာရီလောက်က ရေတပ်က သေင်္ဘာတစ်စီးနဲ့ ရဲနဲ့စစ်သား ၁၀ယောက်လောက်က ရွာထဲဝင်တယ်။ အမျိုးသမီးတွေကို သေနတ်နဲ့ထောက် ဓါတ်ပုံပြပြီး လိုက်မေးတာတွေရှိနေတယ်။ ရွာထဲမှာ လည်း လိုက်မွှေနေတယ်။ အခု ညစာစားမယ်ဆိုပြီး တစ်ဖက်ကရွာကို ထွက်သွားတယ်။ ည ၉ နာရီထိုးတဲ့အထိ သူတို့မပြန်သေးဘူး” ဟု အဆိုပါရွာသားက ဆိုသည်။
ထိုသေင်္ဘာရွာကိုကပ်သည့် အချိန်၌ သတင်းများပျံ့နှံ့သွားသဖြင့် ရွာသားအများစု ရှောင်ပုန်းနေကြရ ပြီး ရွာထဲတွင် ကလေးနှင့် သက်ကြီးရွယ်အိုအချို့သာ အိမ်ထဲတွင် ပုန်းရင်း ကျန်ခဲ့သည်။
စစ်တပ်က အာဏာသိမ်းပြီးနောက် စစ်ကောင်စီက အဆိုကျေးရွာတွင် အုပ်ချုပ်ရေးမှူး အသစ်ခန့်အပ်ရန်ကြိုးစားခဲ့ပြီး ရွာသားများကလက်မခံဘဲ ကိုယ်ထူကိုယ်ထ အုပ်ချုပ်ရေးအဖွဲ့ဖွဲ့ပြီး စစ်ကောင်စီကို ဆက်လက် ဆန့်ကျင်ခဲ့သည်။
Burma Associated Press