ကသာတွင် KIA နှင့် PDF ပူးပေါင်းတိုက်ခိုက်မှု ၄ ရက်အတွင်း စစ်ကောင်စီဘက်မှ ဗျူဟာမှူး အပါအဝင် တပ်ဖွဲ့ဝင် ၁၈၀ ထက်မနည်းသေဆုံး
ရန်ကုန်၊ ဇူလိုင် ၁၀
စစ်ကိုင်းတိုင်း၊ကသာမြို့နယ်တွင် KIA နှင့် ပြည်သူ့ကာကွယ်ရေးတပ်ဖွဲ့ PDF တို့ ပူးပေါင်းတိုက်ခိုက်ခဲ့ရာတွင် ၄ ရက်အတွင်း စစ်ကောင်စီဘက်မှ ဗျူဟာမှူးအပါ အဝင် တပ်ဖွဲ့ဝင် ၁၈၀ ဦး သေဆုံးကြောင်း စစ်ကိုင်းPDF က ယနေ့ တရားဝင် သတင်းထုတ်ပြန်သည်။
ကသာမြို့နယ်ပြည်သူ့ကာကွယ်ရေးတပ်ဖွဲ့သည် KIA တပ်မဟာ ၈ ၊ တပ်ရင်း ၅ ၏ ဦးဆောင်မှုဖြင့် စစ်ကောင်စီတပ်များဖြစ်သည့် တပ်မ ၈၈ ၊ ကသာတပ်ရင်း ၃၀၄ နှင့် ၃၀၉ တို့ကို မြို့လှကျေးရွာအနီးတွင် ခုခံကာကွယ်တိုက်ခိုက်နိုင်ခဲ့ကြောင်း ထုတ်ပြန်သည်။
ဇူလိုင်လ ၅ ရက်နေ့ ည ၉ နာရီခန့်တွင် PDF နှင့် KIA က ထောင်ထားသောမိုင်း ၂ လုံးမိသဖြင့် စစ်ကောင်စီအဖွဲ့ဝင် ၁၀ ဦးထက်မနည်းသေဆုံးခဲ့ကြောင်း၊ ဇူလိုင်လ ၆ ရက်နေ့ နံနက် ၈ နာရီခန့်တွင် ကောက်ကွေ့ချောင်းအတိုင်းနယ်ချဲ့လာသော စစ်ကောင်စီအဖွဲ့ဝင် ၁၀၀ ဦးပါစက်လှေ ၃ စီးကို KIA နှင့် PDF က RPG ဖြင့် အချက်ပေါင်းများစွာပစ်ခတ်ခဲ့ရာ ၂ စီး နစ်မြုပ်ပျက်စီးကာ စစ်ကောင်စီအဖွဲ့ဝင် ၆၀ ဦးထက်မနည်းသေပြီး (၁) စီးမှာထွက်ပြေးသွားခဲ့ကြောင်း သိရှိရသည်။
ဇူလိုင်လ ၇ ရက်နေ့ ည ၁၀ နာရီခန့်တွင် စစ်ကောင်စီတပ်မှ ဗျူဟာမှူးဦး ဆောင် ၍ နယ်မြေအတွင်း ကျွံဝင်လာရာ အသင့်ကာကွယ်ထားသည့်မိုင်း ၄ လုံးမိ၍ ဗျူဟာမှူးအပါအဝင် စစ်ကောင်စီဘက်မှ ၃၀ ထက် မနည်းသေဆုံးကြောင်း သတင်းထုတ်ပြန်သည်။
ဇူလိုင်လ ၉ ရက်နေ့တွင် မြို့လှကျေးရွာသို့ စစ်ကောင်စီတိုက်လေယာဉ် ၄ စီးနှင့် လေကြောင်းပစ်ကူ ခြေလျင်ထိုးစစ်တို့ဖြင့်ဝင်ရောက်လာသဖြင့် တိုက်ပွဲပြင်းထန်ခဲ့ပြီး စစ်ကောင်စီဘက်မှ ၅၀ ဦးထက်မနည်း သေဆုံးကာ ၇၀ ထက်မနည်း ဒဏ်ရာရရှိခဲ့ကြောင်း၊ PDF ဘက်မှ ၃ ဦးကျဆုံးကာ ၃ ဦး အဆက် အသွယ်ပြတ်နေကြောင်း သတင်းထုတ်ပြန်သည်။
ဇူလိုင်လ ၉ ရက်နေ့ ညနေပိုင်းတွင် ကသာ ၃၀၉ တပ်ရင်းမှ မြို့လှသို့စစ်ကူလာသော Double Cub ၁ စီးနှင့် ၆ ဘီးကား (၁) စီးတို့ကို ပေါမမြိုင်ကျေးရွာနှင့် ကသာကားကြီးကွင်းကြားတွင် KPDF နှင့် KIA ပူးပေါင်းတပ်မှ ပဒေသာမိုင်းအတွဲဖြင့် တိုက်ခိုက်ခဲ့ရာ စစ်ကောင်စီဘက်မှ ၃၀ ဦး ထက်မနည်းသေဆုံးခဲ့ကြောင်း သတင်းထုတ်ပြန်ထားသည်။
စစ်ကောင်စီတပ်ဖွဲ့ဝင်များသည် မိုးတားကြီးအုပ်စု၊ မိုးတားလေးအုပ်စု၊ အုပ်ချေ၊ မြို့လှ၊ မှတ်တိုင်၊ နမ့်စန်း၊ ဆူးပုတ်ကုန်းရွာအနီးတဝိုက်တွင် ၎င်းတို့ တပ်ဖွဲ့ဝင်များ ၏အလောင်းများကို ကျင်းတူးမြုပ်နှံလျက်ရှိပြီး ဒဏ်ရာရနှင့် မသေမရှင်များကို ရေကြောင်းမှ သယ်ယူလျက်ရှိကြောင်း သတင်းထုတ်ပြန်ထားသည်။