တောင်ဒဂုံမှ အသက် ၄၂ နှစ်အရွယ် ကိုကျော်ကျော်ကို အကြမ်းဖက်စစ်ကောင်စီက ဖမ်းဆီးသတ်ဖြတ်၊ ဆေးစာတွင် ရောဂါခံအကြောင့် သေဆုံးဟု လက်မှတ်ထိုးမှ ပုပ်ပွနေသောအလောင်းကို သဂြိုလ်ခွင့်ပြု
ရန်ကုန်၊ မေ ၁၆
ရန်ကုန်တိုင်း၊ တောင်ဒဂုံမြို့နယ်၊ အမှတ် ၅၆ ရပ်ကွက်မှ အသက် ၄၂ နှစ်အရွယ် ကိုကျော်ကျော်ကို အကြမ်းဖက်လူသတ်ဖက်ဆစ်စစ်ကောင်စီတပ်များက မေလ ၁၄ ရက်နေ့တွင် ဖမ်းဆီးသွားခဲ့ပြီး ၂ ရက်အကြာ သတ်ဖြတ်ပြီး ပုပ်ပွနေသော အလောင်းပြန်ပေးကြောင်း ဒေသခံများက ရန်ကုန်ခေတ်သစ်သတင်းဌာနသို့ ပြောဆိုသည်။
ကိုကျော်ကျော်အပါအဝင် အမျိုးသား ၄ ဦးကို အကြမ်းဖက်စစ်ကောင်စီတပ်များက ဖမ်းဆီးသွားခဲ့ကြောင်း၊ ယခင်က တောင်ဒဂုံတွင် စစ်ကောင်စီကို ခံတပ်ဆောက်၍ ခုခံစဉ်က ဦးဆောင်ပါဝင်သည်ဟုဆိုကာ ဖမ်းဆီးသွားခြင်းဖြစ်ကြောင်း၊ မိုဘိုင်းလ်ဖုန်းတွင် တော်လှန်ရေး ဓာတ်ပုံများ တွေ့သည်ဟုဆိုကာ ညှဉ်းပန်းနှိပ်စက်ကြကြောင်း၊ ယင်းနောက် ၂ ရက်အကြာတွင် အလောင်းပြန်ပေးပြီး ဆေးစာတွင် ရောဂါအခံကြောင့် သေဆုံးသည်ဟု ရေးသားစေကြောင်း သိရှိရသည်။
"ကိုကျော်ကျော်ကို မူလအခံရောဂါကြောင့်သေဆုံးဟု လက်မှတ်ထိုးထုတ်ရတယ်။ ဖုန်းထဲမှာ တော်လှန်ရေးဓါတ်ပုံများမိလို့ဆိုပြီး ၁၄ ရက်နေ့ ညနေ ၄ နာရီက ဖမ်းသွားတာ။ ဒီနေ့ ကြည်စု မှာ မီးသဂြိုလ်တယ်။ အလောင်းက ပုပ်နေပြီ" ဟု ဒေသခံတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။
"အရင် ၅၆ မှာဖြစ်တဲ့ကိစ္စမှာ ဦးဆောင်သူထဲပါတယ်ဆိုပြီး ဖမ်းသွားတာ သူက ကားမှတ်တိုင်နားမှာဒိန်ချဥ်ရောင်းတယ်။ ဒီကနေ့ပဲအလောင်းပြန်လာပို့လို့ချက်ခြင်းသဂြိုလ်လိုက်ရတယ် အလောင်းမှာကလီစာတွေတခုမှမပါတော့ဘူး" ဟု ဒေသခံတစ်ဦးက ဆိုသည်။
ဒေသခံများ၏ အဆိုအရ ရုပ်အလောင်းတွင် နှိပ်စက်ထားသော ဒဏ်ရာ ဒဏ် ချက်များစွာ တွေ့ရပြီး မျက်နှာတွင် အညိုအမည်းများရှိကြောင်း၊ ပါးစပ်တွင်လည်း သွားများရိုက်ချိုးခံထားရသည့် ပုံရှိပြီး ပါးစပ်တစ်ခုလုံး ရောင်ကိုင်းနေကြောင်း သိရှိရသည်။
ကိုကျော်ကျော်၏ အသုဘအခမ်းအနားကို စစ်ကောင်စီတပ်များက လိုက်လံ ကြည့်ရှုပြီး ဓာတ်ပုံ ရိုက်ကူးခွင့်မပေးကြောင်း သိရှိရသည်။
ကိုကျော်ကျော်နှင့်အတူ ဖမ်းဆီးခံရသော ကျန်အမျိုးသား ၃ ဦး၏ အခြေအနေကိုလည်း လက်ရှိအချိန်အထိ သတင်းတစ်စုံတစ်ရာမရရှိသေးကြောင်း ဒေသခံများက ပြောဆိုကြသည်။