ရန်ကုန် ဗိုလ်တထောင်မှ ကျဆုံးလူငယ် ၆ ဦး၏ ရုပ်အလောင်းများကို စစ်ကောင်စီက စုပေါင်း သဂြိုလ်ရန် စီစဉ်နေ၊ မောင်ကောင်းမင်းသန့် သေနတ်ဖြင့် အပစ်ခံရပြီး တိုက်ပေါ်မှ ပြုတ်ကျပြီးနောက် ကျန်လူငယ် ၅ ဦးပါ လိုက်ပါ ခုန်ချသွားခြင်းဖြစ်
ရန်ကုန်၊ ဩဂုတ် ၁၁
ရန်ကုန်တိုင်း၊ ဗိုလ်တထောင်မြို့နယ် ၄၄ လမ်း အောက်ဘလောက် အိမ်အမှတ် ၃၈ ကို အကြမ်းဖက် လူသတ် စစ်ကောင်စီတပ်များက ဝင်စီးနင်းစဉ် တိုက်ပေါ်မှ ပြုတ်ကျ၊ ခုန်ချ၍ သေဆုံးသွားသော ကျဆုံးလူငယ် ၆ ဦး၏ ရုပ်အလောင်းများကို စစ်ကောင်စီက မိသားစုများထံ ပြန်မပေးဘဲ စုပေါင်းသဂြိုလ်ရန်ရှိနေကြောင်း ရဲနှင့်နီးစပ်သော သတင်းရပ်ကွက်ထံမှ သိရှိရသည်။
ယမန်နေ့ ညနေပိုင်း စစ်ကောင်စီတပ်များက ဗိုလ်တထောင်တိုက်ခန်းကို စီးနင်းစဉ် လူငယ် ၅ ဦး တိုက်ပေါ်မှ ပြုတ်ကျ၊ ခုန်ချ၍ သေဆုံးခဲ့ခြင်းဖြစ်ပြီး လိုက်လံ ဖမ်းဆီးစဉ် စစ်ကောင်စီတပ်များက လူငယ်များကို ပစ်ခတ်ခဲ့မှု ရှိခဲ့ကြောင်း သိရှိရသည်။
"ကောင်းမင်းသန့်က တိုက်ပေါ်မှာ အရင်ဆုံး အပစ်ခံရပြီး ပြုတ်ကျသွားတာ၊ အဲဒါ ကျန်တဲ့သူတွေက လက်တွဲပြီး ခုန်ချလိုက်ကြတာ" ဟု ဖြစ်စဉ်ကို သိရှိထားသော မျက်မြင်တစ်ဦးက ရန်ကုန်ခေတ်သစ်သို့ ယနေ့နံနက်တွင် ဆက်သွယ်ပြောဆိုလာသည်။
ကျဆုံးသွားသည့် လူငယ်များမှာ မောင်ကောင်းမင်းသန့်၊ မောင်ရဲမင်းဦး၊ မောင်ဝေယံထက်၊ မဝေဝေမြင့်၊ ကိုဝေဇော်၊ မောင်မင်းသစ္စာအောင်တို့ ကွယ်လွန်သွားကြပြီး သီဟကောင်းဆက်နှင့် မပိုးကျော်ကျော်ခန့်မှာ ဖမ်းဆီးရခြင်းဖြစ်ကြောင်း သိရှိရသည်။
"သိသလောက်ကတော့ သေသွားတဲ့လူငယ်တွေကို ဘယ်သူတွေလဲဆိုတာ စိစစ်နေတယ်။ ဖမ်းမိတဲ့သူဆီကနေ တစ်ဆင့် မေးမြန်းနေတယ်လို့ သိထားပါတယ်။ သူတို့တိုက်ခန်းထဲမှာလည်း ပစ္စည်းတွေ မိထားတော့ ဆုံးသွားတဲ့သူတွေက အမှုရှိတယ်ပေါ့။ အဲဒီတော့ မိသားစုဆီကို အလောင်းပြန်ပေးတာမျိုး မရှိနိုင်ပါဘူး။ မိသားစုကို ရဲဘက်ကနေ အကြောင်းကြားမယ်။ သဂြိုလ်တဲ့အချိန် လာဖို့ ခေါ်မယ်။ ဓာတ်ပုံရိုက်တာတွေ ဘာတွေလည်း ခွင့်ပြုဖို့မရှိနိုင်ဘူး။ ဒီဘက်က အစီအစဉ်နဲ့ပဲ သဂြိုလ်ဖို့ရှိတယ်။ အခုကတော့ သိသလောက် စိစစ်နေဆဲပဲ" ဟု ရန်ကုန်တိုင်းရဲတပ်ဖွဲ့နှင့်နီးစပ်သူတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။
ပေးပို့လာတဲ့ သတင်းတွေ အရ ဗိုလ်တစ်ထောင်က တိုက်ပေါ်ကနေ ခုန်ချတဲ့ ကလေးတွေ အဖွဲ့မှာ
- မင်းသစ္စာအောင် (ခ) ဗလ
- ကောင်းမင်းသန့် (ခ) flex
- သီဟကောင်းဆက်
- ပိုးကျော့ကျော့သွယ်
- ဝေထွန်း
- ရဲမင်းဦး (ခ) ရဲကြီးတို့
ပါဝင်တယ်လို့ သိရပါတယ်။
လောလောဆယ်တော့ တိုက်ပေါ်က ခုန်ချတဲ့ ၅ ယောက်စလုံး ကျဆုံးသွားပြီလို့ သိရပြီး မခုန်ချ ဖြစ်တဲ့ တစ်ယောက် ကတော့ အဖမ်းခံထားရ ပါတယ်။ ဘယ်သူက ကျဆုံးပြီး ဘယ်သူက အဖမ်းခံရတယ် ဆိုတာ အတိအကျ မသိရသေး ပါဘူး။
P.S. တစ်ဦးတည်းသော အမျိုးသမီးက Facebook မှာ Wai Wai Myint (ပန်းသီး) ဆိုတဲ့ အကောင့် ရှိတယ်လို့ သိရပါတယ်။